Lynggatan

Lynggata 2 er vandað fjölbýlishús í einu fallegasta íbúðahverfi höfuðborgarsvæðisins, Urriðaholti í Garðabæ. Í lynggrónu landslagi rísa nýbyggingar þétt og mynda ramma utan um líf íbúanna. Vinkillaga byggingin sker sig frá öðrum húsum hverfisins í efnisvali en litur roðagylltrar klæðningarinnar breytist með gangi sólar og veðurs - dálítið líkt og rautt lyngið gerir að hausti. Uppbrot í húshliðum sem snúa að götu og útivistarsvæði gefur tilfinningu um borgarlegan mælikvarða og hjálpar til við að skapa sterka götumynd.
Íbúðirnar eru fjölbreyttar að stærð og skipulagi - en allar eru þær bjartar enda búnar stórum gluggum sem innramma fallegt útsýnið. Alúð hefur verið sett í hönnun íbúðanna með notagildi og þægindi að leiðarljósi. Hér ætti hver sem er að geta skapað sér gott heimili.